მუსიკის საერთაშორისო ფესტივალის ფარგლებში, გაიმართა დასკვნითი კულტურული ღონისძიება - შეხვედრა მარინა ჩიხლაძესთან, სახელწოდებით „საუბრები მუსიკაზე“.

26 სექტემბერს, თელავის ისტორიულ მუზეუმში, მუსიკის საერთაშორისო ფესტივალის ფარგლებში, გაიმართა დასკვნითი კულტურული ღონისძიება - შეხვედრა მარინა ჩიხლაძესთან, სახელწოდებით „საუბრები მუსიკაზე“.

შეხვედრის ფარგლებში დამსწრე საზოგადოებას შესაძლებლობა ჰქონდა, მოესმინა საინტერესო საუბარი მუსიკის ისტორიასა და მნიშვნელობაზე, ასევე, გაცნობოდა უნიკალურ ფოტო და ვიდეო მასალას ვანო სარაჯიშვილის სახელობის თბილისის სახელმწიფო კონსერვატორიის ისტორიის მუზეუმიდან.

მარინა ჩიხლაძე 1997 წლიდან ხელმძღვანელობს მის მიერ დაარსებულ ვანო სარაჯიშვილის სახელობის თბილისის სახელმწიფო კონსერვატორიის ისტორიის მუზეუმს. მისი თაოსნობით მუზეუმში რეგულარულად იმართება კონცერტები, საიუბილეო და ხსოვნის საღამოები, ფესტივალები და საინტერესო შეხვედრები. ასევე მიმდინარეობს მუზეუმის ფონდის ელექტრონული ბაზის შექმნა.

აღნიშნული ღონისძიებით დასრულდა მუსიკის საერთაშორისო ფესტივალის ფარგლებში ,თელავის ისტორიულ მუზეუმში დაგეგმილი წლევანდელი კულტურული პროგრამა.

თელავის ისტორიული მუზეუმი მადლობას უხდის მუსიკის საერთაშორისო ფესტივალის ორგანიზატორებს, განსაკუთრებულ მადლობას კი ქალბატონ თამარ ლორთქიფანიძეს,ასეთი საინტერესო და მრავალფეროვანი კულტურული პროგრამის წარმოდგენისათვის.

თელავის ისტორიული მუზეუმი მუსიკის საერთაშორისო ფესტივალის უცვლელი მხარდამჭერი და მასპინძელია.